Prezidentimiz tashabbusi bilan har yili dekabr oyining ikkinchi yakshanbasi mamlakatimizda Qishloq xo‘jaligi xodimlari kuni sifatida keng nishonlanmoqda. Bugun Nukus shahrining shimoliy qismidagi Otchopar maydonida Qishloq xo‘jaligi xodimlari kuniga bag’ishlab tantanali bayram tomoshalari bo‘lib o‘tdi. Tadbirning ochilish marosimida Qoraqalpog’iston Respublikasi Jo‘qorg’i Kengesining Raisi Amanbay Orыnbaev so‘zga chiqib, yig’ilganlarni Qishloq xo‘jaligi xodimlari kuni bayrami bilan tabrikladi. Jo‘qorg’i Kenges Raisi o‘z so‘zida bugungi kunda mamlakatimizda qishloq xo‘jaligini modernizatsiya qilish, sohaga yangi texnika va innovatsion texnologiyalarni joriy etish, er-suv resurslaridan samarali foydalanishni kengaytirish, aholini sifatli oziq-ovqat mahsulotlari bilan ta’minlash, fermer va klasterlarni qo‘llab-quvvatlash bo‘yicha olib borilayotgan keng ko‘lamli ishlarga to‘xtalib o‘tdi. Shuningdek, hurmatli Prezidentimiz tomonidan Qoraqalpog’iston uchun alohida qabul qilingan qaror va farmonlar asosida xalqimizning farovon hayotini ta’minlash bo‘yicha juda katta ishlar amalga oshirilayotganiga to‘xtaldi. Bayram tadbirida Qoraqalpog’iston Respublikasi Vazirlar Kengashining Raisi F.Ermanov ishtirok etdi. Bugungi bayram tantanasida yurtimizda agrar sohada samarali faoliyat olib borayotgan bir qator mehnat faxriylari rag’batlantirildi. Eng ilg’or fermer xo‘jaligi nominatsiyasiga «Yuldash katli» f/x boshlig’i Ibragimov Bahodir munosib topildi va Prezidentimiz sovg’asi Traktor topshirildi. Shuningdek, «Eng yaxshi bog’bon» nominatsiyasi bo‘yicha «Maylыbaev Dүysenbay» MChJ raisi Maylыbaev Dүysenbay mini traktor, «Eng yaxshi chorvador fermer» nominatsiyasi bo‘yicha: «Erbol sharo‘a» f/x rahbari Utebaev Baxram katta motoroller bilan taqdirlandi. Bundan tashqari, «Eng yaxshi parrandachi,» «Eng yaxshi baliqchi» nominatsiyalari g’oliblari granulyator, «Eng yaxshi asalarichi», «Eng yaxshi ipakchi», «Eng yaxshi mexanizator,» «Eng yaxshi kombaynchi”larga muzlatgich, «Eng yaxshi qorako‘lchilik xo‘jaligi», «Eng yaxshi irrigator», «Eng yaxshi meliorator», «Eng yaxshi veterinar», «Eng yaxshi o‘simliklarni himoya qiluvchi laborant» nominatsiyalari g’oliblarining har biri skuter, eng yaxshi tomorqa er egalarining har biriga moto kultivator, «Eng yaxshi qishloq xo‘jaligi innovatori»ga noutbuk topshirildi. Bundan so‘ng bayram tomoshalari xalq o‘yinlari va milliy sport o‘yinlari bilan davom etdi. Dastlab, arqon tortish musobaqalari boshlandi. Unda Chimboy tumani birinchi, Qo‘ng’irot tumani ikkinchi, Taxtako‘pir tumani jamoasi uchinchi o‘rinlarni egalladi. Qo‘chqorlar urushi o‘yinlari ham tomoshabinlarda katta qiziqish uyg’otdi. Unda Nukus shahri, Beruniy, Qonliko‘l, Qo‘ng’irot, Amudaryo tumanlaridan kelgan qo‘chqorlar g’alaba qozondi. Har bir g’olib chiqqan qo‘chqorlarning egalariga qimmatbaho sovg’alar topshirildi. Ya’ni: birinchi o‘rinni egallagan qo‘chqorlarga gibrid motoroller, keyingi o‘ringa elektromotoroller, bundan tashqari boshqa qo‘chqor egalariga skuter va televizorlar va qimmatbaho sovg’alar topshirildi. Bayram ishtirokchilari e’tibori maydonga qaratildi. Bosh bayroq uchun maydonda Nukus tumanidan Zaxiriddiyin Zaytov va Ichki ishlar organi xodimi Sarsenbaev Ernazar bahslashdi. Bir-biriga munosib polvonlar bellashuvida Sarsenbaev Ernazar g’alaba qozondi. Qoraqalpog’iston Respublikasi Jo‘qorg’i Kengesining Raisi Amanbay Orыnbaev polvonga bosh bayroq – Prezidentimiz sovg’asi 50 million so‘m mukofotni topshirdi. 2-o‘rin egasi Z.Zaytov – xolodilnik, 3-o‘rin Qo‘ng’irot tumanidan E.Aytbaev, Shumanaydan M.Abdixalikovlar qimmatbaho sovg’alar bilan taqdirlandi. Navbatdagi vazn toifalari bo‘yicha: 81 kg vaznda T.Ochilov 30 mln. so‘m, 73 kg vaznda Z.Ismatov 20 mln. so‘m pul mukofoti bilan taqdirlandi. Bundan keyin bir, uch, besh, besh aylovga (yo‘rg’a), etti, o‘n aylovga otlar yuborildi. Unda respublikamizning barcha tumanlaridan kelgan mohir chavandozlar tashkilotchilar tomonidan qo‘yilgan qimmatbaho sovg’alar uchun poygaga tushdi. O‘n aylanishga ot choptirish hammaning e’tiborida bo‘lib, poygaga birinchi bo‘lib kelgan Kegeylidan Abdirazaxov Maxsutning tulpori bosh bayroqni qo‘lga kiritdi. Unga Prezidentimiz sovg’asi «Oniks» avtomashinasi topshirildi. Keyingi o‘rinlarni egallaganlar: 2-o‘rinni olgan Shumanay chavandoziga 50 mln. so‘m, 3-o‘rinni olgan Qonliko‘l chavandoziga 30 mln. so‘m pul mukofoti va qimmatbaho sovg’alar berildi. 7 aylov bo‘yicha: 1-o‘ringa 30 mln. sum, 2-o‘ringa 20 mln. sum, 3-o‘ringa 15 mln. sum, 5 aylov bo‘yicha: 1-o‘ringa 20 mln. sum, 2-o‘ringa 15 mln. sum, 3-o‘ringa 10 mln. sum, 5 aylov yo‘rg’a yo‘nalishi bo‘yicha: 1-o‘ringa 20 mln. sum, 2-o‘ringa 15 mln. sum, 3-o‘ringa 10 mln. sum, 3 aylov bo‘yicha: 1-o‘ringa 10 mln. sum, 2-o‘ringa 5 mln. sum, 3-o‘ringa pыlesos, 1 aylov bo‘yicha: 1-o‘ringa xolodilnik, 2-o‘ringa televizor, 3-o‘ringa pыlesos topshirildi. Shuningdek, «Qiz quvish» juftliklari, «Tugun olish» bo‘yicha har bir g’olib, «Uloq» musobaqalari g’oliblarining har biri qimmatbaho sovg’alar bilan taqdirlandi. Bayram ishtirokchilariga dehqonlarimiz tomonidan etishtirilgan qishloq xo‘jaligi mahsulotlari yarmarkasi, mohir oshpazlarimiz tayyorlagan turli taomlar taqdim etildi. San’at ustalari ijrosidagi kontsert dasturi bayram ishtirokchilariga katta zavq bag’ishladi. Qishloq xo‘jaligi xodimlari kuniga bag’ishlab o‘tkazilgan bayram tomoshalari xalq sayli bilan davom etdi.

manba: https://joqargikenes.uz/uz/