Ma’lumki, Qoraqalpog‘iston Respublikasi Jo‘qorg‘i Kengesining Raisi Amanbay Orinbayev boshchiligida Amudaryo tumanida majlis o‘tkazilib, hududni har tomonlama rivojlantirish va keng ko‘lamli obodonlashtirish ishlarini olib borish, kambag‘allikni qisqartirish, fuqarolar hayotida uchrayotgan muammolarni hal etish, shu bilan birga mahallalar infratuzilmasini yaxshilash va boshqa qator vazifalar belgilab olingan edi.
28- yanvar kuni tumanda Jo‘qorg‘i Kenges Raisi boshchiligida tuproq yo‘llarni qum-shag‘al aralashmali yo‘llarga aylantirish, keng ko‘lamli obodonlashtirish ishlarini olib borish bo‘yicha amaliy ishlar boshlab yuborildi.
Tumandagi Toshqal’a mahallasida tashkil etilgan soha rahbarlari va mutasaddilar bilan uchrashuvda Jo‘qorg‘i Kenges Raisi Amanbay O'rinbayev Amudaryo tumanida boshlangan ushbu obodonlashtirish ishlari doirasida mahallalar va qishloqlarning ichki xo‘jalik yo‘llariga qum-shag‘al qorishmasi to‘shalib, bu boradagi ishlar keng ko‘lamda, tumanning boshqa hududlarida ham davom ettirilishini ta’kidladi.
Qayd etish joizki, shu paytgacha tumanning turli ovul va mahallalaridagi umumiy uzunligi 107 km bo‘lgan tuproq yo‘llar yozda qum-chang, yomg‘irli kunlarda esa loy bilan qoplanib, aholini qiynab kelayotgan edi. Endilikda ushbu yo‘llarga qum-shag‘al aralashmasini yotqizish orqali ushbu muammolarni bartaraf qilib, aholining uzog‘ini yaqin, mushkulni oson qilish ko‘zda tutilmoqda.
Respublika miqyosidagi rahbarlar ishtirokida dastlab Toshqal’a mahallasida boshlangan obodonlashtirish ishlarida maxsus texnikalar ishtirok etib, tumandagi idora-tashkilotlar va Favqulodda vaziyatlar boshqarmasi xodimlari safarbar qilingan. Yaqin kunlarda Toshqal’a mahallasidagi umumiy uzunligi 6 kilometr 380 metr bo‘lgan tuproq yo‘llari qayta ta’mirlanishi rejalashtirilgan.
Shuningdek, ushbu keng ko‘lamli obodonlashtirish ishlari doirasida aholiga elektr energiyasi yetkazib berishdagi muammolar ham bartaraf qilinmoqda. Xususan, Toshqal’a mahallasidagi barcha ko‘chalardagi eskirgan, yaroqsiz holga kelib qolgan 100dan ortiq elektr ustunlarini yangi temir-beton ustunlarga almashtirish rejalashtirilgan bo‘lib, maxsus texnikalar jalb qilingan holda bu ishlar ham boshlab yuborildi.
Qayd etish joizki, tumanda 2025-yil mobaynida davlat dasturlari asosida barcha manbalar hisobidan jami 30 mlrd 833 mln. co‘m mablag‘ evaziga 8ta obyektda qurilish-ta’mirlash ishlarini amalga oshirish belgilangan.
Qolaversa, O‘zbekiston Respublikasi Vazirlar Mahkamasining 2024-yil 11-oktabr kungi “Shaharlar va boshqa aholi punktlari ko‘chalari hamda ichki xo‘jalik yo‘llari infratuzilmasini yanada takomillashtirish to‘g‘risida”gi 665-sonli qaroriga asosan, joriy yilda 4 mlrd. so‘m mablag‘lar evaziga tuman hududidagi 13 km ichki yo‘llarni shag‘allashtirish ko‘zda tutilgan bo‘lib, hozirgi vaqtda loyiha hujjatlari ishlab chiqilmoqda.
Ma’lumot o‘rnida aytish joizki, tumanda jami 1 ming 117 km uzunlikdagi ichki yo‘llar mavjud bo‘lib, shundan salkam yarmi, ya’ni 527 kilometri tuproq yo‘llar, 518 kilometri tosh yo‘llar, 60 kilometri asfalt yo‘llar hamda 8,9 kilometri sement-beton yo‘llardir.
O‘tgan 2024-yil mobaynida ham tumanda ichki yo‘llarni ta’mirlash bo‘yicha qator amaliy ishlar qilingan. Xususan, O‘zbekiston Respublikasi Prezidentining 2023-yil 10-oktabr kungi qarorga asosan 153 km, hamda Vazirlar Mahkamasining 500-sonli qaroriga asosan 34 km uzunlikdagi tuproq yo‘llarga tosh yotqizish belgilangan bo‘lib, bugungi kunda tuman obodonlashtirish boshqarmasiga 4,8 mlrd. so‘m mablag‘ ajratilgan va ushbu mablag‘lar evaziga 34 km uzunlikdagi ichki yo‘llarga tosh shag‘al aralashmasi yotqizilgan. Toshqal’adan boshlangan va tumanning barcha hududlari qamrab olinishi ko‘zda tutilgan keng ko‘lamli obodonlashtirish va ta’mirlash ishlari ham ushbu islohotlarning uzviy davomidir.
Charos Arslonova, tuman hokimligining Axborot xizmati rahbari.