O‘tgan asrning 79-89-yillarida Afg‘onistondagi fuqarolik urushi va qurolli to‘qnashuvlarda ishtirok etgan sobiq Sovet ittifoqi qo‘shinlari 1989-yil 15-fevral kuni mamlakat hududidan olib chiqib ketilgan edi. Ushbu sana Afg‘on urushi faxriylarining bayramiga aylangan. Salkam o‘n yil mobaynida Afg‘oniston hududida bo‘lib o‘tgan harbiy harakatlarda Respublikamizdan 3580 nafar harbiy xizmatchilar ishtirok etgan. An’anaga muvofiq bu yil ham Afg‘on urushi qatnashchilari, jangchi-faxriylar ishtirokida ushbu mamlakatdan sobiq Sovet ittifoqi qo‘shinlari olib chiqilganining 36 yilligi keng nishonlanmoqda. Amudaryo tumanida ham sana munosabati bilan urush faxriylarining aholi va yoshlar bilan uchrashuvlari hamda bayram tadbirlari tashkil etilmoqda.

Amudaryolik afg‘on urushi qatnashchilari bo‘lmish jangchi-faxriylar ishtirokida tumandagi Xotira maydoniga o‘rnatilgan “Motamsaro ona” haykali poyiga gulchambarlar qo‘yildi. Baynalmilal jangi-faxriylar Afg‘onistondagi urush harakatlarida qatnashib, shahid bo‘lgan quroldoshlari xotirasiga hurmat bajo keltirib, urush qiyinchiliklari, uning salbiy oqibatlarini eslab, yurtimizdagi tinchlik mangu bo‘lishini tilab duoga qo‘l ochdilar.

So‘ngra tantanalar Mang‘it shahridagi “Diamond” restoranida davom ettirildi. Bu yerda afg‘on urushi qatnashchilari bo‘lmish baynalmilal jangchilar uchun bayram dasturxoni yozildi.

Tuman hokimligi tomonidan tashkil etilgan tadbirda hokimning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Nodirbek Kamolov, tuman Mudofaa ishlari bo‘yicha bo‘lim boshlig‘i Shuhrat Mamatov, respublika Ma’naviyat va ma’rifat markazi tuman bo‘limi boshlig‘i Islom Matkarimov hamda O‘zbekiston “Veteran” jangchi-faxriy va nogironlar birlashmasining tumandagi vakili Bahodir Jumaniyozov boshchiligida bir guruh faxriy jangchilar ishtirok etdi.

Bayram tadbirini tuman hokimi o‘rinbosari Nodirbek Kamolov tabrik so‘zi bilan ochib berdi. U o‘z nuqida Afg‘onistonda chorak asrcha davom etgan o‘zaro urushlarga barham berish uchun sobiq ittifoq armiyasi safida safarbar qilingan, murakkab sharoitlarda jang-u jadallarda qatnashib, omon qaytgan faxriylar uchun 15-fevral – sobiq ittifoq qo‘shinlari olib chiqib ketilgan sana chinakam bayram ekanligini ta’kidladi hamda ularni bayram bilan tabrikladi. Sana munosabati bilan har yili mamlakatimizda turli tadbirlar o‘tkazilib, Afg‘on urushi faxriylariga alohida hurmat-e’tibor ko‘rsatilayotgani, ularning munosib dam olishi va salomatliklarini tiklashlari uchun hukumatimiz tomondan sharoitlar yaratilganini qayd qilib, Afg‘on urushi faxriylariga tashakkurnomalar, esdalik sovg‘alarini topshirdi.

Bayram tadbirida so‘z olganlar yurtimizda jangchi-faxriylarni har tomonlama qo‘llab-quvvatlashga va halok bo‘lgan vatandoshlarimizning xotirasini abadiylashtirishga katta e’tibor qaratilayotganini qayd qilib, ushbu urush qanchadan-qancha oilalarning yostig‘ini quritgani, bugungi tinch va osoyishta hayotimizning qadriga yetish, yoshlarni vatanparvarlik ruhida tarbiyalashda urush faxriylarining tajribasi va hayot yo‘lini o‘rnak qilib ko‘rsatish lozimligini qayd etdilar. Afg‘on urushida halok bo‘lgan faxriylarni xotirlash har birimizning insoniy burchimiz ekanligi alohida ta’kidlandi.

Ma’lumotlarga ko‘ra, Afg‘on urushida 65 ming nafar O‘zbekiston fuqarolari qatnashib, ularning 1500 nafardan ko‘prog‘i halok bo‘lgan. Amudaryo tumanidan harbiy harakatlarda ishtirok qilgan fuqarolarning 13 nafari janglarda halok bo‘lgan, 20 nafari urushda yaralangan, 278 nafari esa bugungi kunda tinch va osoyishta yurtimizda umrguzaronlik qilmoqda.

Bayram tadbiri mobaynida tuman Madaniyat bo‘limi san’atkorlari tomonidan konsert dasturi namoyish etildi. Xonandalar tomonidan ijro etilgan Vatan, ona, tinchlik, shukronalik haqidagi sho‘x-shodon kuy-qo‘shiqlar faxriylarimizga bayramona ko‘tarinki kayfiyat bag‘ishladi.

Charos Arslonova, tuman hokimligining Axborot xizmati rahbari.