Xalqni rozi qilish, uning o‘tayotgan har bir kuniga mazmun bag‘ishlash, turmushi farovonligini oshirish bugungi kunda davlat idoralari, shu barobarida xizmat ko‘rsatuvchi idoralar mas’ullarining zimmalaridagi yuksak burch va majburiyatlariga aylandi. Ayniqsa, ijtimoiy infratuzilma va kommunal xizmatlarga doir muammolarni hal qilish borasidagi amaliy chora-tadbirlar tizimli ravishda tashkil qilinayotgani quvonarli. Bunga biz “Amudaryotumangaz” idorasining aholiga suyultirilgan gaz yetkazib berish bo‘limi faoliyati bilan tanishish asnosida yaqqol guvoh bo‘ldik.
Avvallari Amudaryo tumanining eng chekka hududlarida yashovchi aholining deyarli barchasi tuman markaziga – “Amudaryotumangaz” idorasiga kelib maishiy gaz ballonlariga suyultirilgan gaz to‘ldirish uchun uzundan-uzoq navbatda turishar, hatto bir necha kunlab kutib ham qolishardi. Endilikda esa suyultirilgan gaz iste’molchilarini qiynab kelayotgan bu muammo bartaraf etilgan.
Ayni paytda tuman bo‘yicha suyultirilgan gaz iste’molchilari 25 ming 450 nafar bo‘lib, shundan 25 ming 410 nafari aholi iste’molchilari va 40 nafari maishiy soha iste’molchilari hisoblanadi. Tumandagi 38 ta ovul va mahallalar hududidagi iste’molchilar suyultirilgan gazga moslashtirilgan bo‘lib, “Amudaryotumangaz” idorasi tomonidan 1 ta servis markazi va 7 ta shoxobcha orqali iste’molchilarga suyultirilgan gaz uzluksiz yetkazib berilmoqda. Aholi ham, maishiy soha iste’molchilari ham bu borada ko‘rsatilayotgan xizmat sifatidan mamnun.
Xolimbeg servis markazi Ayoqchi mahallasi hududida joylashgan. Ushbu servis markazi orqali Xolimbeg va Qilichboy ovullari hamda Ayoqchi mahallasi hududidagi iste’molchilarga suyultirilgan gaz kechiktirilmay, o‘z vaqtida yetkazib berilmoqda.
Mang‘it shahrida joylashgan “Markaz” maishiy gaz ballon qabul qilish va tarqatish shoxobchasi orqali Choyko‘l, Bosuv, To‘lqin, O‘rta qal’a, Arna bo‘yi, Bog‘, Amir Temur va Tosh yop ovul hamda mahallalari hududidagi iste’molchilarga uchun suyultirilgan gaz yetkazib beriladi.
Kuyuk ko‘pir ovulida joylashgan gaz ballon qabul qilish va tarqatish shoxobchasi orqali esa mazkur ovuldan tashqari O‘zbekiston mahallasi va Bobur ovuli hududidagi iste’molchilarga ham suyultirilgan gaz yetkazib berish ishlari namunali tashkil qilingan.
Shuningdek, Bo‘z yop ovuli hududida joylashgan gaz ballon qabul qilish va tarqatish shoxobchasi mazkur ovuldagi iste’molchilarga xizmat ko‘rsatsa, Qipchoq shoxobchasidan shu atrofdagi 5ta, Oq oltin shoxobchasidan mazkur hududdagi 2 ta, Qangli shoxobchasidan 2 ta va Bo‘z solma shoxobchasidan 3 ta ovul va mahallalardagi iste’molchilarga suyultirilgan gaz yetkazib beriladi.
Tumanning Tosh qal’a, Besh ovul, Yuqori qishloq, Xizr eli, Tor yop, Namuna, Qizilcholi va Jumur ovul mahallalari hamda Xitoy va Nazarxon ovullari hududlaridagi iste’molchilarga “Amudaryotumangaz” idorasi tomonidan biriktirilgan maxsus transport vositalari orqali rejaviy jadval asosida har 30-35 kunda joyiga borgan holda – aylanma usulda gaz ballon to‘ldirish ishlari amalga oshiriladi.
2024-yil davomida aholi iste’molchilariga 4 ming 249 tonna, maishiy soha iste’molchilari uchun 42 tonna suyultirilgan gaz tarqatish rejalashtirilgan bo‘lib, ushbu belgilangan fond bo‘yicha aholi va maishiy soha iste’molchilariga suyultirilgan gaz o‘z vaqtida yetkazib berildi. Ayni paytda tumangaz filiali aylanmasida jami 31 ming 728 ta maishiy gaz ballonlari mavjud bo‘lib, shundan 2 ming 491 tasi aholi hisobidagi shaxsiy, 29 ming 237 tasi esa tumangaz korxonasi hisobidagi maishiy gaz ballonlaridir. Suyultirilgan gaz ballonlaridan foydalanishda iste’molchilarga qiyinchilik tug‘dirmaslik maqsadida maishiy gaz ballonlarini o‘z vaqtida ta’mirlash, qiyoslovdan o‘tkazish, zichlikka sinash ishlari ”Amudaryotumangaz” idorasi tomonidan, samarali tarzda tashkil etilmoqda.
2025-yilning yanvar oyi uchun rejadagi 385,8 tonna o‘rniga 402,2 tonna suyultirilgan gaz yetkazib berildi. Fevral oyining ikki o‘n kunligi davomida esa aholi iste’molchilariga 250 tonnaga yaqin, maishiy soha iste’molchilariga esa 1 tonnaga yaqin suyultirilgan gaz yetkazib berildi.
Tuman gaz ta’minoti bo‘limiga 5 ta maxsus “ISUZU” rusumli avtotransport vositalari biriktirilgan bo‘lib, ular orqali iste’molchilarga suyultirilgan gaz uzluksiz ravishda yetkazib berilmoqda. Maxsus avtotransportlar hamda gaz ballonlarni qabul qilish va tarqatish shoxobchalari davlat qiyoslovidan o‘tkazilgan va elektron tarozi bilan to‘liq ta’minlangan.
Qish oylarining sovuq va izg‘irinli kunlarida gaz ballonlari orqali “zangori olov” o‘z vaqtida, uzluksiz yetkazib berilayotganidan iste’molchilar mamnun.
ROBIYA YO‘LDOSHЕVA.
manba: amunews.uz