O'zbekiston Respublikasida qabul qilingan yangi Mehnat kodeksi mehnat munosabatlarini yanada shaffoflik, adolatlilik prinsiplari asosida tartibga solish maqsadlariga xizmat qilmoqda. Ushbu hujjatda mehnat huquqlarini himoya qilish, ish beruvchi va ishchi o'rtasidagi muvozanatni ta'minlash, shuningdek, mehnat bozorini zamonaviy talablarga moslashtirishga alohida e’tibor qaratilgan. Yangi Mehnat kodeksida qator yangiliklar va imkoniyatlar belgilab berilgan.
Xususan, mehnat shartnomalarining mazmuni va shakli yanada aniq va shaffof qilib belgilanib, ish beruvchilar ishchilarga shartnoma tuzishda ularning huquqlari va majburiyatlarini to'liq tushuntirishlari shart ekanligi, bu esa mehnat munosabatlarida nizo va kelishmovchiliklarning oldini olishga yordam berishi qayd etilgan.
Shuningdek, xotin-qizlar va yoshlarning mehnat huquqlari yanada kuchaytirilib, ayollarning ish joyida diskriminatsiyaga uchramasligi, shuningdek, bolali ayollarga qo'shimcha imtiyozlar berilishi nazarda tutilgan. Yoshlar uchun esa birinchi ish joyini topishda qo'llab-quvvatlash choralari ko'rilgan.
Qolaversa, Yangi Mehnat kodeksida ish joylarida xavfsizlik va sog'liqni saqlash standartlari nazorati kuchaytirilib, xodimlarning sog'lig'ini himoya qilish va kasb kasalliklarining oldini olishga alohida e’tibor qaratilgan.
Hujjatda mehnat nizolarini hal qilishning yangi tez va samarali mexanizmlari joriy etilishi ko’zda tutilgan bo’lib, bu ish beruvchi va ishchi o'rtasidagi kelishmovchiliklarni sudga bormasdan, tinch yo'l bilan hal qilish imkoniyatini beradi.
Ta’kidlash joizki, yangi Mehnat kodeksi mehnat munosabatlarini yanada adolatli va zamonaviy satndartlar asosida tartibga solishga qaratilgan muhim qadamdir. Ushbu hujjat ishchilar va ish beruvchilar o'rtasidagi muvozanatni ta'minlash, shuningdek, mehnat bozorini rivojlantirishga xizmat qiladi. Hujjat ijrosi va unda belgilangan tamoyillarning amalga oshirilishi bilan O'zbekistonda mehnat sharoitlari yaxshilanadi, mehnat huquqlari himoyasi kuchayadi va iqtisodiyotning barqaror rivojlanishiga hissa qo'shiladi.
B.Qadamov, Amudaryo tumani adliya bo’limi Davlat xizmatlari markazi bosh mutaxassisi.