Ayolning nafosati va nazokati, vafo va sadoqati, aql-zakovati va fidoyiligi asrlar mobaynida yer yuzida hayot davomiyligi va abadiyligiga asos bo‘lib keladi. Oila va jamiyat ustuni, hayotimizning fayzi va ko‘rki bo‘lgan xotin-qizlarni e’zozlash, ularga hurmat va ehtirom ko‘rsatish xalqimiz uchun azal-azaldan buyuk qadriyat bo‘lib kelgan. Ayol bor ekan hayot go‘zal va mazmunli, xonadonlar obod va nurafshondir.

8-mart – Xalqaro xotin-qizlar kuni. Ushbu sana butun dunyo bo‘ylab go‘zallik va nafosat timsoli bo‘lgan ayol-qizlarning bayrami sifatida keng nishonlanadi. Bayram munosabati bilan ularga har doimgidan-da ulug‘ ehtirom ko‘rsatilib, e’zozlanadi va sharaflanadi.

Sana munosabati bilan Amudaryo tumani Madaniyat bo‘limida ham katta konsert dasturi tashkil etildi. Bayram tadbirini tuman hokimi Sobir Xo‘jametov tabrik so‘zi bilan ochib berdi. Tuman hokimi o‘z nutqida yurtimizda xotin-qizlarni har tomonlama qo‘llab-quvvatlash, onalik va bolalikni muhofaza qilish, oila mustahkamligini ta’minlash davlat siyosati darajasida ekanligi ta’kidladi, bu borada amalga oshirilayotgan islohotlar va ularning tumanimizdagi ijrosi xususida to‘xtaldi.

Ta’kidlanganidek, bugungi kunda davlatimiz rahbari tashabbusi bilan barcha sohalarda xotin-qizlarga ko‘plab yangi imkoniyatlar berilmoqda. Xususan, xotin-qizlar tadbirkorligi uchun yaratilayotgan imkoniyatlardan foydalanib, tumanimizda 1000 nafardan ziyod tadbirkor ayollar faoliyat yuritib kelmoqda.

Shuningdek, “Hech kim mehr va e’tibordan chetda qolmaydi” degan ezgu tamoyil asosida 2024-yilda “Ayollar daftari”ga kiritilgan ijtimoiy himoyaga muhtoj 5 ming 600 nafar xotin-qizlarga turli yordamlar ko‘rsatilib, “Ayollar daftari”dan chiqarildi. 4 nafar ayol-qizlar uy-joy bilan ta’minlandi, 8 nafar ehtiyojmand xotin-qizlarning uy-joyi homiylik hisobidan ta’mirlab berildi. Boquvchisini yo‘qotgan, yashash sharoiti og‘ir deb topilgan 15 nafar xotin-qizlarning uy-joy ijarasi uchun kompensatsiya to‘lab berildi. Nogironligi bo‘lgan 2 nafar ayolning jarrohlik amaliyoti uchun “Xotin-qizlarni qo‘llab-quvvatlash” maqsadli jamg‘armasi hisobidan mablag‘ ajratib berildi.

Qolaversa, Oila va xotin qizlar qo‘mitasining tavsiyanomasi asosida tumanimizdan 10 nafar xotin-qizlar Oliy ta’lim muassasalariga davlat granti asosida talabalikka qabul qilindi. “Ayollar daftari” jamg‘armasidan 2 nafar, tuman hokimligi hisobidan esa 13 nafar oilaviy sharoitlari og‘ir xotin-qizlarning shartnoma pullari oliy ta’lim muassasalari to‘lab berildi.

Tuman hokimining tabrik so‘zidan keyin turli sohalarda samarali faoliyat olib borayotgan ayol-qizlarga tashakkurnoma hamda bayram sovg‘alari topshirildi. Bayram tadbiri tuman Madaniyat bo‘limi tomonidan tayyorlangan bir-biridan ajoyib chiqishlar, betakror kuy-qo‘shiqlar bilan davom etdi. Tumanimizning umidli xonandalari go‘zallik, sevgi, do‘stlik, bahor, ona va ayolni madh etuvchi kuy-qo‘shiqlar bilan barcha tadbir ishtirokchilariga yuqori bayramona kayfiyat bag‘ishladilar.

Ta’kidlash joizki, ushbu bayram go‘zal va betakror yurtimizga bahor nafasi kirib kelganidan darak beradi. Qutlug‘ sanada xotin-qizlarga ehtirom ko‘rsatish an’anasi yil sayin umumdavlat va umumjamiyat ahamiyatiga ega bo‘lib, yuqori maqom darajasiga ko‘tarilmoqda.

Ayol azaldan mehr-shafqat va sadoqat timsoli bo‘lib kelgan. Inson, oila, ayol tushunchalarini bir-biridan ajralgan holda tasavvur etib bo‘lmaydi. Oilani ham, jamiyatni ham birlashtirib, unga fayz-u baraka kiritadigan xonadonlarimizni mehr-muhabbat, nafosat, ezgulik nuri bilan munavvar qiladigan zotlar ham aslida mo‘tabar onalarimiz, munis opa-singillarimizdir. Ulug‘ donishmandlar Vatanga eng munosib ta’rif izlaganda, uni Ona siymosiga qiyos etganlarida ham katta ma’no bor.

Fursatdan foydalanib, barcha dilbar ayol-qizlarni, onaxonlarimiz, opa-singillarimizni ezgulik va go‘zallik bayrami – 8 mart – Xalqaro xotin-qizlar kuni bilan samimiy tabriklaymiz, oilaviy xotirjamlik, xonadonlariga tinchlik, fayz-u baraka tilaymiz! Doimo xalqimiz, Vatanimizning yuksak mehri va ardog‘ida, yaqinlaringizning e’zozida yashang, aziz va muhtarama ayollar!

Charos Arslonova, tuman hokimligining Axborot xizmati rahbari.