Insoniyat tarixida ayol har doim ezgulik, vafo va mehr-muhabbat timsoli bo‘lib kelgan. Ayniqsa, xalqimiz uchun ona siymosi har narsadan ustun, uning duosi esa eng buyuk kuch sanaladi. Shu bois yurtimizda xotin-qizlarga, xususan, hayotini el-yurt xizmatiga bag‘ishlagan nuroniy onaxonlarga e’tibor va hurmat ustuvor ahamiyat kasb etadi.
8-mart – Xalqaro xotin-qizlar kuni arafasida o‘tkazilayotgan ezgu tashabbuslar bunga yorqin dalildir. Bayram munosabati bilan tuman hokimi o‘rinbosari, Oila va xotin-qizlar bo‘limi boshlig‘i Go‘zal Saburova boshchiligidagi mas’ullar nuroniy onaxonlarning xonadonlariga tashrif buyurib, ularni samimiy qutlashdi.
Chordara mahallasida istiqomat qiluvchi 80 yoshli nuroniy onaxon Svetlana Plotshina umrining 37 yilini yosh avlodga bilim berishga bag‘ishlagan. U maktabda rus tili o‘qituvchisi sifatida minglab shogirdlarga ta’lim-tarbiya bergan. Bayram munosabati bilan tashrif buyurgan mas’ullar uni samimiy muborakbod etib, sovg‘a-salomlar tuhfa qilishdi.
Shuningdek, mas’ullar Xizr eli mahallasida yashovchi 110 yoshli nuroniy onaxon Pardagul Bekniyozova xonadoniga ham tashrif buyurishdi. 110 bahorni qarshilagan ushbu tabarruk onaxon uzoq yillar el-yurt xizmatida bo‘lib, bugun farzand, nabira va chevaralarining duogo‘yi sifatida umr kechirmoqda.
Shu kuni Kuyuk ko‘pir ovulida yashovchi 102 yoshli Sharifa Babaniyozova xonadoniga ham tashrif buyurildi. Ona mehrining cheksizligi, inson hayotidagi beqiyos o‘rni haqida so‘z ketganda, mana shunday nuroniy onaxonlar timsolida bu haqiqat yanada yaqqol namoyon bo‘ladi. Ular yoshligida hayot qiyinchiliklari bilan kurashib, mashaqqatli mehnat qilgan, bugungi farovon kunlarning asosini yaratgan fidoyi avlod vakillaridir.
Mamlakatimizda xotin-qizlarning jamiyat hayotidagi ishtirokini kengaytirish, ularning mehnat sharoitlarini yaxshilash, ijtimoiy muhofazasini ta’minlash borasida izchil islohotlar olib borilmoqda. Ayollar nafaqat oilada, balki davlat boshqaruvi, iqtisodiyot, fan-ta’lim, tibbiyot, san’at va madaniyat sohalarida ham yetakchi kuchga aylangan.
Bugun jamiyatda nuroniy onaxonlarimizning duosi, hayotiy tajribasi bebaho xazinaga aylanmoqda. Davlatimiz rahbari tomonidan xotin-qizlarning ijtimoiy faolligini oshirish, ularga munosib sharoit yaratish masalalariga alohida e’tibor qaratilyapti. Shu bois, 8 mart arafasida bunday hurmat-e’tiborning namoyon bo‘lishi yuragida ona siymosiga nisbatan cheksiz muhabbat bilan yashaydigan xalqimizga xos ezgu qadriyatlarning ifodasidir.
Nuroniy onaxonlar – o‘tgan asrning barcha sinovlarini o‘z ko‘zi bilan ko‘rgan, el-yurtga fidoyi xizmat qilgan insonlar. Ular tinch va farovon yurtda farzandlari, nabiralari davrasida umr kechirayotganidan shukronalar aytib, duolar qilmoqda. Ularning xonadoniga tashrif buyurish, ko‘ngliga quvonch ulashish e’tibor bilan birga insoniy burch hamdir.
Bugun mamlakatimizda xotin-qizlar, ayniqsa, hayotini fidokorona mehnatga bag‘ishlagan nuroniy onaxonlar doimiy e’tibor va e’zozda. Zero, ayol – jamiyat tayanchi, oila bekasi, farzand tarbiyachisi. Ularga bo‘lgan hurmat esa faqat bayram arafasida emas, balki doimo yuksak bo‘lishi kerak.
S. Olloyorova, Amudaryo tumani hokimligi mutaxassisi.
manba: amunnews.uz