29-mart kuni Amudaryo tumani hokimligining Axborot xizmati tomonidan “Amudaryo tumanida aholining ijtimoiy himoyaga muhtoj qatlamini qo‘llab-quvvatlash borasida amalga oshirilayotgan ishlar hamda kelgusidagi rejalar” yuzasidan matbuot anjumani tashkil etildi. Matbuot anjumanida tuman “Inson” ijtimoiy xizmatlar markazi mas’ullari, Xalq deputatlari tuman kengashi deputatlari hamda “Amudaryo TV” telekanali va “Taraqqiyot ko‘zgusi” gazetasi jurnalist va muxbirlari, yosh jurnalistlar ishtirok etdilar.

Matbuot anjumanini tuman hokimligining Axborot xizmati rahbari, tuman hokimining matbuot kotibi Charos Arslonova ochdi hamda olib bordi. Matbuot kotibi o‘z so‘zida so‘nggi yillarda davlatimiz rahbari tomonidan davlat hokimiyati va boshqaruv organlari faoliyatida ochiqlik va oshkoralikni ta’minlash, ommaviy axborot vositalarining o‘rni va ahamiyatini mustahkamlashga qaratilayotgan yuksak e’tibor va bu boradagi islohotlar xususida so‘z yuritdi.

Muhtaram prezidentimiz Shavkat Mirziyoyev o‘z ma’ruzalarida: “Ommaviy axborot vositalari so‘zda emas, amalda “To‘rtinchi hokimiyat” darajasiga ko‘tarilishi zarur” degan iborani ko‘p bora ta’kidlaydilar. Darhaqiqat, bugun OAVning jamiyat siyosiy hayotidagi o‘rni sezilarli darajada oshib, amalda “To‘rtinchi hokimiyat”ga aylanmoqda desak, mubolag‘a bo‘lmaydi.

O‘zbekiston Respublikasining “Davlat hokimiyati va boshqaruvi organlari faoliyatining ochiqligi to‘g‘risida”gi Qonuni bilan davlat hokimiyati va boshqaruvi organlari faoliyatida ochiqlik va oshkoralik siyosatini amalga oshirishda ommaviy axborot vositalarining o‘rni va ahamiyatini yanada oshirish borasidagi vazifalar mustahkamlangan.

Matbuot anjumanida tuman “Inson” ijtimoiy xizmatlar markazi boshlig‘i G‘ulomjon Duysenboyev kun tartibidagi mavzu yuzasidan hisobot berdi. Hisobotda markaz tomonidan barcha toifadagi ijtimoiy himoyaga muhtoj insonlarni qo‘llab-quvvatlash borasida olib borilayotgan ishlar haqida atroflicha ma’lumot berildi.

Ta’kidlanganidek, so‘nggi yillarda aholining ijtimoiy himoyasini kuchaytirish, davlat tomonidan fuqarolarga ijtimoiy xizmat ko‘rsatish ko‘lami va turlarini kengaytirish bo‘yicha tizimli ishlar amalga oshirilmoqda. Jumladan, ijtimoiy dasturlarni moliyalashtirish xarajatlari 2 baravarga oshib, kam ta’minlangan nafaqa oluvchi oilalar qamrovi 5 barobarga ko‘paydi hamda nogironligi bo‘lgan shaxslar va bolalarning parvarishi bilan band bo‘lganlar uchun yangi nafaqa turlari joriy etildi.

Yangi tahrirdagi Konstitutsiyada ham mehnatga layoqatsiz va yolg‘iz keksalar, nogironligi bo‘lgan shaxslar hamda aholining ijtimoiy jihatda ehtiyojmand boshqa toifalarining huquqlari davlat himoyasida ekanligi alohida norma sifatida belgilab qo‘yilgan.

Aholini ijtimoiy himoya qilish va ijtimoiy xizmatlar ko‘rsatish sohasidagi yagona davlat siyosatini muvofiqlashtirib borish maqsadida O‘zbekiston Respublikasi Prezidenti huzurida Ijtimoiy himoya milliy agentligi hamda uning Qoraqalpog‘iston Respublikasi, viloyatlar va Toshkent shahar boshqarmalari va tuman hamda shaharlarda “Inson” ijtimoiy xizmatlar markazlari tashkil etildi.

Matbuot anjumani mobaynida mahalliy OAV vakillari hamda deputatlar tomonidan mavzu yuzasidan yo‘llangan savollarga atroflicha ma’lumotlar hamda tushunchalar berildi. Jumladan, voyaga yetmaganlar, ota-onasidan mahrum bo‘lgan yetim bolalarni ijtimoiy himoya qilish, mahallalardagi ijtimoiy xodimlar faoliyati, markazga kelib tushayotgan murojaatlar bo‘yicha savollarga batafsil ma’lumotlar berildi.

Markazning Bolalarni ijtimoiy himoya qilish shu’basi tomonidan berilgan ma’lumotlarga ko‘ra, ota-ona qaramog‘idan mahrum bo‘lgan jami 245 nafar voyaga yetmagan bolaga vasiy va homiy tayinlangan, shundan vasiylikka olinganlari 152 nafarni, homiylikka olinganlari 94 nafarni tashkil etib, ularning 38 nafari chin yetim bolalardir. Yetim va ota-ona qaramog‘idan mahrum bo‘lgan 17 yoshga to‘lgan 4 nafar voyaga yetmagan bolalar hamda 18-23 yoshli 3 nafar yoshlarni joriy yil davomida uy-joy bilan ta’minlash rejalashtirilgan.

Matbuot anjumani savol-javoblarga boy tarzda o‘tdi.

Charos Arslonova, tuman hokimligining Axborot xizmati rahbari.