Ma’lumki, har yili O‘zbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati va Milliy gvardiyasining qo‘shma qarori bilan tasdiqlangan “Muddatli harbiy xizmatni o‘tayotgan harbiy xizmatchilarga O‘zbekiston Respublikasi oliy ta’lim muassasalariga o‘qishga kirish uchun tavsiyanomalar berish tartibi to‘g‘risida”gi Nizom asosida harbiy xizmatchilarga tegishli tartibda tavsiyanomalar topshiriladi. Favqulodda vaziyatlar vazirligining Maxsus muhandislik-qurilish boshqarmasida muddatli harbiy xizmatni o‘tab, yuqori natijalarga erishgan askarlarga ham qo‘mondonlikning shu kabi tavsiyanomalari Amudaryo tumanida tantanali ravishda topshirildi.

Marosimda Muhandislik muhofaza va qurilish-tiklash ishlari bosh boshqarmasi boshlig‘i polkovnik Nurmuxammad Saidov, Amudaryo tuman xokimi Sobir Xo‘jametov, tuman hokimi o‘rinbosari Nodirbek Kamolov, tuman Ichki ishlar bo‘limi boshlig‘i podpolkovnik Muxametali Xojamuratov, Milliy Gvardiyaning tuman bo‘limi boshlig‘i podpolkovnik Baxtiyor Atajanov, tuman Mudofaa bo‘limi boshlig‘i Shuhrat Mamatov, Afg‘on urushi faxriylari hamda askarlar va ularning ota-onalari ishtirok etdilar.

Tadbir avvalida O‘zbekiston hamda Qoraqalpog‘iston Respublikalari davlat madhiyalari yangradi.

Muhandislik muhofaza va qurilish-tiklash ishlari bosh boshqarmasi boshlig‘i polkovnik Nurmuxammad Saidov taqdirlash marosimini kirish so‘zi bilan ochib berdi.

Tadbirda tuman hokimi Sobir Xo‘jametov so‘zga chiqib, oliy ta’lim muassasalariga o‘qishga kirish uchun tavsiyanomalar olayotgan barcha askarlarni tabrikladi. Tadbirda so‘zga chiqqanlar bunday imkoniyatlar yoshlar kelajagi uchun poydevor bo‘lishi, ularning hayotda o‘z o‘rnini topishlariga ko‘mak berishi xususida so‘z yuritdilar.

Ta’kidlanganidek, tavsiyanomalar O‘zbekiston Respublikasi Qurolli Kuchlari safida muddatli harbiy xizmatni o‘tab bo‘lgan, jangovar va ma’naviy-ma’rifiy tayyorgarlik bo‘yicha yuksak natijalarga erishgan, zaruriy bilim saviyasiga ega, namunali harbiy intizomini namoyon etgan eng munosib harbiy xizmatchilarga harbiy qism komandiri tomonidan beriladi. O‘zbekiston Respublikasi Qurolli Kuchlari safida muddatli harbiy xizmatni o‘tab bo‘lgan fuqarolarga harbiy qismlar qo‘mondonligi tomonidan oliy ta’lim muassasalariga kirish uchun berilgan tavsiyanomalar, ular berilgan sanadan boshlab uch yil mobaynida amal qiladi.

Marosim davomida Maxsus muhandislik-qurilish boshqarmasi boshlig‘ining 2025-yil 7-martdagi buyrug‘iga asosan oliy ta’lim muassasalariga o‘qishga kirishlari uchun imtiyozli tavsiyanomalarga loyiq deb topilgan askarlar taqdirlandi. Xizmat mobaynida o‘zining tartib-intizomi, xulq-atvori, mas’uliyatini namoyish etgan, namuna ko‘rsatgan askarlarga tavsiyanomalar tantanali ravishda topshirildi.

Qayd etish joizki, Qoraqalpog‘iston Respublikasining mahallalarida “Obod xonadon”, “Obod ko‘cha”, “Obod mahalla”, “Yashil belbog‘” hamda ichki yo‘llarni ta’mirlash mezonlarini bajarish, mahallalar infratuzilmasini yaxshilash, aholi uchun munosib turmush sharoitlarini yaratish borasida amalga oshiriladigan ishlarni samarali tashkil etish maqsadida Favqulodda vaziyatlar vazirligi Maxsus muhandislik-qurilish boshqarmasi 1-muhandislik qurilish batalonining 220 nafar shaxsiy tarkibi Amudaryo tumaniga jalb etilgan edi. Ular tumanda obodonlashtirish va ko‘kalamzorlashtirish ishlariga munosib hissa qo‘shdilar. Tadbir mobaynida askarlar va ularning ota-onalari so‘zga chiqib, berilayotgan imkoniyatlar uchun minnatdorchilik bildirdi.

Shuningdek, taqdirlash marosimi tuman Madaniyat bo‘limi ijodkorlari tomonidan tayyorlangan konsert dasturi namoyish etildi. Xonandalar Vatan, tinchlik va do‘stlik haqida kuy-qo‘shiqlar ijro qilishdi. Tadbir raqqosalarning betakror raqslari bilan bayramona kayfiyatda o‘tdi.

Charos Arslonova, tuman hokimligining Axborot xizmati rahbari.