Keyingi yillarda mamlakatimizda jinoyatchilikka qarshi kurashish va huquqbuzarliklarning oldini olish bo‘yicha keng ko‘lamli islohotlar amalga oshirilmoqda. Mazkur islohotlar doirasida aholining tinch va osoyishta hayotini ta’minlash hamda jamoat xavfsizligi madaniyatini shakllantirish bo‘yicha ijobiy natijalarga erishilmoqda. Bundan tashqari, huquqbuzarliklar profilaktikasi va ularning oldini olish, shuningdek fuqarolarga yuksak huquqiy madaniyat va qonunga hurmat tuyg‘usini singdirish borasidagi huquqiy mexanizmlar ham yanada takomillashtirilmoqda.
Joriy yilning 3-yanvar sanasida imzolangan O‘zbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi qarori bu borada muhim dasturulamal bo‘lmoqda.
2-aprel kuni Amudaryo tumani hokimligining majlislar zalida Prezident qarori ijrosini ta’minlash borasida amalga oshirilayotgan ishlar va kelgusidagi rejalarga bag‘ishlangan yig‘ilish bo‘lib o‘tdi. Unda Qoraqalpog‘iston Respublikasi Ichki ishlar vazirining birinchi o‘rinbosari Jasurbek Atayev, tuman hokimi Sobir Xo‘jametov, tuman Prokuraturasi, Ichki ishlar bo‘limi mas’ullari, hokim o‘rinbosarlari, bo‘limlar, tashkilotlar rahbarlari hamda “Mahalla yettiligi” mas’ullari ishtirok etdilar.
Yig‘ilishni tuman hokimi Sobir Xo‘jametov kirish so‘zi bilan ochib berdi. Tuman hokimi o‘z so‘zida bugungi kunda huquqbuzarliklarning oldini olish, jinoyatchilikni jilovlash masalasi davlat siyosati darajasiga ko‘tarilganligini, jinoyatchilikka qarshi kurashish, huquqbuzarliklarning profilaktikasi yuzasidan huquqni muhofaza qiluvchi organlar bilan birga mutasaddi idoralar zimmasiga muhim vazifalar yuklanganligini hamda bu boradagi islohotlar ijrosini ta’minlash bo‘yicha qator chora-tadbirlar amalga oshirilayotgani xususida so‘z yuritdi.
Qoraqalpog‘iston Respublikasi Ichki ishlar vazirining birinchi o‘rinbosari Jasurbek Atayev so‘zga chiqib, yuqoridagi Prezident qarori bilan belgilab berilgan mahallalarda xavfsiz muhitni yaratish borasidagi ustuvor vazifalar xususida so‘z yuritdi.
Xususan, joriy yilda “Har bir mahallada huquqbuzarliklarning barvaqt oldini olish” ustuvor vazifa etib belgilanib, ishlash mexanizmlari joriy etildi.
2024-yilda jinoyat sodir etilgan har bir mahallada kriminogen vaziyatni barqarorlashtirish hamda jinoyatlarni barvaqt profilaktika qilishning mahallalar kesimida choraklik manzilli chora-tadbirlarini belgilagan holda mahalla — tuman — viloyat darajasida uning ijrosi uchun bevosita mas’ul rahbarlar biriktirilganligi va aniq sohaviy javobgarlik yuklanganligi ta’kidlandi.
Shuningdek, qaror bilan kriminogen vaziyat og‘ir mahallalarda ilmiy-amaliy yondashuvlar asosida joylarga chiqqan holda maqsadli o‘rganishlarni o‘tkazish orqali huquqbuzarliklarga sabab bo‘layotgan asl omillarni aniqlash va barham berish bo‘yicha tashkiliy-huquqiy choralarni ko‘rish, mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarning oldini olishda “mahalla yettiligi” har bir vakilining aniq mas’uliyatini belgilash, ushbu toifadagi huquqbuzarliklar profilaktikasiga yangicha ish uslublarini tatbiq qilish belgilab berilgan asosiy vazifalardan ekani ta’kidlandi.
Qolaversa, yig‘ilish mobaynida aholining huquqiy ongi, ijtimoiy faolligi va fuqarolik mas’uliyatini oshirish, jinoyat sodir etilishiga sabab bo‘lishi mumkin bo‘lgan ijtimoiy muammolarni hal etishga jamoatchilik vakillari, nuroniylar va mahalla faollarini keng jalb etib borish, mahallalar jamoat joylari va yashash xonadonlarida xavfsiz muhit yaratish, fuqarolar hayoti, sog‘lig‘i va mol-mulkiga har qanday tajovuzlarning oldini olish maqsadida huquqbuzarliklar profilaktikasiga zamonaviy raqamli texnologiyalar va texnik vositalarni keng joriy etish lozimligi ta’kidlandi.
Charos Arslonova, tuman hokimligining Axborot xizmati rahbari.