Prezidentimizning 2020 yil 2 oktabr kuni Qoraqalpog‘iston Respublikasi Jo‘qorg‘i Kengesining navbatdan tashqari sessiyasida bergan topshiriq hamda kengaytirilgan tarzda o‘tkazilgan majlis bayonida belgilangan vazifalar ijrosi asosida “Yoshlar ovozi” tanlovi tashkil etilgan edi.
Mazkur tanlov o‘tgan yili ilk marotaba o‘tkazilishiga qaramay, yoshlar orasida tez fursat ichida o‘z o‘rnini topdi. Bu yil ham tanlovni an’anaga aylantirish maqsadida yangi ovozlar kashf etilmoqda. Ayni kunlarda Respublikamiz bo‘ylab “Bo‘zatov iqtidorlarni kashf etadi!” shiori ostida tanlovning yangi mavsumi bo‘lib o‘tmoqda. Ushbu tanlov Yoshlar ishlari agentligi va qator hamkor tashkilotlar bilan birgalikda o‘tkazilmoqda.
Tanlovning tuman bosqichi 16 aprel kuni Amudaryo tumanida ham ko‘tarinki ruhda va yuqori saviyada o‘tkazildi. Tanlov ishtirokchilari 10-15, 16-22, 23-30 yosh toifalarida baxshichilik, an’anaviy ijro yaniy, maqom, katta ashula, suvoraxonlik, opera va estrada yo‘nalarida o‘z iiste’dodini namoyon qildilar.
Tanlovni tuman hokimi o‘rinbosari Mahmud Shermetov ochib berdi hamda mahalla va sektor bosqichlarida g‘oliblikni qo‘lga kiritib, tuman bosqichigacha yetib kelgan barcha ishtirokchilarni samimiy tabriklab, hududiy va Respublika bosqichlarida ham omad tiladi.
Hakamlar hay’ati tadbir davomida barcha ishtirokchilarning iste’dod va qobiliyatlarini odilona baholab bordilar.
Ahamiyatli jihati, tanlovning holis va haqqoniy o‘tishini ta’minlash maqsadida har bir ishtirokchining chiqishlari to‘liq tasvirga olinib, Yoshlar ishlari agentligi tuman bo‘limining ijtimoiy tarmoqdagi rasmiy sahifalariga joylab borildi.
Tanlovning yakuniy natijalariga ko‘ra, 10-15 yosh toifasida baxshichilik yo‘nalishi bo‘yicha Jo‘rabek Saidabdullayev, Hursand Davlatboyev, 16-22 yosh toifasida Otabek Jumaboyev, Javohir Saidabdullayev, 23-30 yosh toifasida Og‘abek Sadullayevlar g‘oliblikni qo‘lga kiritdi.
An’anaviy ijro yo‘nalishi bo‘yicha esa 10-15 yosh toifasida Kamron Xolboyev, Samir Yusupbayev, 16-22 yosh toifasida Suntalullo Xo‘jamuratov, Sevinch Bektursinova, 23-30 yosh toifasida Sardor Masharipov, Elbek O‘razbayevlar g‘oliblar safidan joy olishdi.
Shuningdek, opera yo‘nalishida 10-15 yosh toifasida Ravshanbek Kamalov, Navro‘z Haytimbetov, 16-22 yosh toifasida Izzat Abdukarimov, 23-30 yosh toifasida Sherxon O‘tamuradovlarga teng keladigan raqib topilmadi. Estrada yo‘nalishi bo‘yicha esa 10-15 yosh toifasida Sevinchoy Mavlonbergenova, Sohibjon Yo‘ldashev, 16-22 yosh toifasida Dilshoda Bahramova, Alisher Xudoyberganov, 23-30 yosh toifasida Otabek Ahmadov, Shohida Qodirovalar tanlovning tuman bosqichi mutloq g‘oliblari bo‘ldilar.
G‘oliblar Yoshlar ishlari agentligi tuman bo‘limi tomonidan taqdirlandi hamda hududiy bosqichga yo‘llanmani qo‘lga kiritdilar. Ma’lumot o‘rnida aytish kerakki, tanlovning Respublika bosqichida har bir yo‘nalish bo‘yicha 1-o‘rin egasi 50 mln, 2- va 3-o‘rin sovrindorlari mos ravishda 30 hamda 20 mln so‘m pul mukofotini qo‘lga kiritishadi. Bundan tashqari, Respublika bosqichining qolgan ishtirokchilari 10 mln so‘m pul mukofoti bilan taqdirlanadilar.
Tumanimizning xushovoz yoshlariga hududiy va Respublika bosqichlarida omad tilaymiz!
Tuman hokimligining Axborot xizmati